Mbrëmë në orët e vona ndodhi një përleshje me armë në rrugën “B” në Prishtinë, ku mbetën të plagosur dy persona, një i dyshuar dhe një kalimtar rasti.
Në këtë përleshje u përfshi edhe Policia, dhe këtë e konfirmoi zëdhënësi i Policisë, Bajram Krasniqi.
Gazeta Sinjali raporton se zyrtari policor i Njësisë së Reagimit të Shpejtë në Prishtinë, që shtiu me armë në drejtim të dyshuarit, i cili nuk i përfilli urdhrat e Policisë për ndaljen e të shtënave me armë, është Izet Vrajolli.
I dyshuari, bashkë me një person tjetër, po ashtu të dyshuar kishin shtënë me armë mes vete, deri në momentin kur Policia doli në vendin e ngjarjes dhe u kërkoi t’i lëshonin armët në tokë.
Personi që u plagos rezistoi, duke gjuajtur me armë në drejtim të Policit, por që u plagos një kalimtare e rastit. Pas këtij momenti, zyrtari policor Izet Vrajolli u detyrua të shtie në drejtim të tij.
I dyshuari u plagos në këmbë dhe u dërgua në QKUK për trajtim.
Përveç tij, edhe e plagosura tjetër, kalimtarja e rastit është dërguar në Emergjencë, pas lëndimeve të marra. Insajderi.org