E fundit/ Vazhdon aksioni “Subvencioni 2021”, arrestohet zyrtari i Drejtorisë së Bujqësisë në Pejë

Policia e Kosovës, Drejtoria e Krimeve Ekonomike dhe Korrupsionit ka vazhduar me aksionin “Subvencioni 2021”, ku kësaj radhe ka arrestuar zyrtarin e Drejtorisë së Bujqësisë në Pejë me inicialet A.B.

Advertisement

Lajmin për Telegrafin e ka konfirmuar drejtori i Drejtorisë së Bujqësisë në Pejë, Mehdi Mulaj.

Mulaj ka thënë se zyrtari i kësaj drejtorie është marrë dje nga policia.

“Po është marrë dje. Na është thënë që i duhet ta shoqërojnë në stacion policor në Prishtinë dhe nuk na kanë treguar diçka më shumë”, ka thënë Mulaj.

Lajmin e ka konfirmuar për Telegrafin edhe zëdhënësi i policisë, Baki Kelani.

“Më datë 01.03.2021 në rajonin e Pejës, Policia e Kosovës ka arrestuar një person të dyshuar lidhur me dyshimet për keqpërdorime të subvencioneve”, ka thënë Kelani.

Ai ka shtuar se i njëjti është dërguar në ndalim për 48 orë.

“Me vendim të prokurorit të Prokurorisë Themelore në Prishtinë, personi i dyshuar është ndaluar për 48 orë”, tha Kelani.

Aksioni policor “Subvencioni 2021”, ka nisur javën e kaluar në Ministrinë e Bujqësisë në Prishtinë, për të vazhduar në disa lokacione tjera të vendit.

Nga ky aksion janë konfiskuar mbi 400 mijë euro, vetura, telefona, laptopë e kompjuterë./Telegrafi/

Advertisement

Leave a Reply

Your email address will not be published. Required fields are marked *