Taravari: Zaev dhe Osmani me sukses po zbatojnë politikat e jashtme pro ruse

Sekretari i Aleancës për Shqiptarët, Arben Taravari në konferencën e sotme për shtyp ka akuzuar pushtetin se si vend kandidat për anëtarësim në Bashkimin Evropian, ka refuzuar zbatimin e sanksioneve që BE ka vendosur për Rusinë, transmeton Alsat.

“Që kur Zoran Zaev është bërë kryeministër i Maqedonisë së Veriut, Këshilli i Bashkësisë Evropiane ka marrë 21 vendime për të vazhduar dhe zgjeruar sanksionet ndaj Rusisë, Qeveria e Republikës së Maqedonisë së Veriut nuk është rreshtuar në këto vendime. Qeveritë Zaev 1 dhe 2 plot 21 herë kanë refuzuar sanksionet ndaj Rusisë”, tha mes tjerash Taravari.

Tutje Taravari ka akuzuar ministrin e Punëve të Jashtme, Bujar Osmani se nuk po i përmbush detyrimet e një vendi kandidat për në Bashkimin Evropian.

“Ministria e Jashtme udhëhiqet nga një shqiptar, i cili po na vë në anën e Vuqiçit, Dodikut dhe të Putinit. Më 10 shtator 2020 dhe me 1 tetor 2020 Këshilli i Bashkësisë Evropiane vazhdoi dhe zgjeroi sanksionet kundër Rusisë, Bujar Osmani si ministër i ri i Punëve të Jashtme në kabinetit Zaev 2 nuk është rreshtuar me vendet e BE-së. Bujar Osmani i cili akuzonte të tjerët që janë dorë e zgjatur e Kremilini, në fakt me sukses po zbaton politikat e jashtme pro ruse”, tha mes tjerash Taravari.

Leave a Reply

Your email address will not be published. Required fields are marked *