Haradinaj falënderon ata që votuan AAK – s’e përmend postin e presidentit

Komisioni Qendror i Zgjedhjeve sot ka mbajtur një mbledhje ku i ka certifikuar rezultatet e zgjedhjeve të 14 shkurtit.

Pas kësaj, kryetari i Aleancës për Ardhmërinë e Kosovës, Ramush Haradinaj, ia ka falënderuar 62.111 votuesit nga Kosova e diaspora që e kanë votuar AAK-në, njofton Klan Kosova.

Por në postimin që e ka bërë në llogarinë e tij në Facebook, ai nuk e ka përmendur postin e presidentit edhe pse garës zgjedhore të 14 shkurtit i ka hyrë me synimin për ta marrë këtë pozitë.

Më poshtë mund ta lexoni shkrimin e plotë të tij në Facebook:

Të nderuar qytetarë të Republikës së Kosovës

Vendi ynë zhvilloi zgjedhje me standarde të larta demokratike, që ngritën pozicionin e Kosovës në arenën ndërkombëtare.

Sot u certifikuan rezultatet e zgjedhjeve të 14 shkurtit.

Falënderoj të gjithë aktivistët dhe strukturat e Aleancës, për punën e vazhduar dhe të palodhur.

Falënderoj kandidatët tonë, nga vendi e diaspora, shumë prej tyre garues për herë të parë, të rinj e të reja që pasuruan me dijen e tyre organizatën tonë të përbashkët politike.

Falënderoj veçanërisht, 62.111 votuesit nga Kosova e diaspora, burra e gra që i besuan Aleancës për Ardhmërinë e Kosovës.

Ju, që përkundër propagandave të qarqeve të ndryshme me të cilat vazhdimisht u sulmua Aleanca, e që nuk u argumentuan asnjëherë, vazhduat të na besoni, ashtu siç e kthyem besimin tuaj me punë, duke i dhënë vendit Ushtrinë, tapitë e Trepçës, pavarësinë energjetike e shumë të tjera, vazhdoni të besoni në ne.

Aleanca që gjatë tërë historisë së saj politike, ka dëshmuar konsistencë në temat e interesit nacional, do të vazhdojë njëjtë dhe besimi juaj do të rezultojë edhe me më shumë punë të mira për shtetin tonë dhe të ardhmen e ndritur të tij dhe për mirëqenien e të gjithë qytetarëve.

Zoti e bekoftë Kosovën!

Për t’u informuar më shumë rreth certifikimit të rezultateve të zgjedhjeve nga ana e KQZ-së, klikoni në linkun e mëposhtëm.

Leave a Reply

Your email address will not be published. Required fields are marked *