Presidenti Ilir Meta ka reaguar pas përplasjes me policinë në zyrat e FRD, ndërsa e konsideroi kërkesën e Policisë së Bashkisë për lirimin e tyre, si një “përpjekje për grusht shteti”.
Meta tha se po kalonte rastësisht pranë zyrave, kur është marrë në telefon nga kreu i kësaj partie, Sali Shehu, ndërsa shtoi se shkresa që i është dërguar kësaj partie për lirimin e zyrave, është pa vulë dhe pa firmë.
Ai i bëri thirrje opozitës që të “zgjohet” dhe mos të lejojë më prekjen e rregullave të garës, pasi në të kundërt “do të jetë shumë vonë për ta”.
Po ashtu Meta i bëri thirrje edhe policisë bashkiake që të respektojnë ligjin, ose “do të përfundoni si policët e Mubarak”.
Meta u fut me forcë në zyrat e FRD, duke u përplasur edhe me policinë, ndërsa iu drejtua atyre duke i thënë: “Dilni përjashta ose do t’ju çoj në burg me duart e mia”.
“E konsideroj si një përpjekje për të realizuar një grusht shteti sepse t’i sjellësh një partie zyrtare opozitare menjëherë pasi nënshkruan një marrëveshje me PD dhe partitë e opozitës për të marr pjesë në zgjedhje, t’i sjellësh një shkresë të tillë, që nuk ka as vulë, as emër titullar që të mbajë përgjegjësi. Të bërë me vrap vetëm për të dhunuar fizikisht e psikologjikisht çdo forcë opozitare e cila synon të konkurrojë në zgjedhje, duke përdorur bashkinë bandë, padyshim që është irrituese dhe një paralajmërim për qytetarët për përpjekjet mafioze për të vënë dorë mbi votën e barabartë dhe i bëj thirrje opozitës që të zgjohet dhe të mos lejoj më asnjë prekje të rregullave të garës sepse do të jetë vonë për të jo për popullin , në rast se do të vazhdojë të tolerojë sjelljet e partisë bandë. Po kaloj rastësisht këtu dhe më njoftoi kryetari i FRD, ju e patë se si dhunohet nga policia kryetari i FRD në kushtet kur këtu vjen presidenti. I bëj thirrje policisë të zbatojnë ligjin, mos të përfundoni si policët e Mubarakur nën këpucët e popullit shqiptar. Po i them kryetarit që ti e di mirë se çafër ke bërë me firmë he pa firmë dhe mos iu bind më”, tha Meta.