Presidenti i UEFA-s jep lajmin e madh: Ndeshjet e EURO 2020 do të luhen me tifozë

Presidenti i UEFA-s, Aleksander Çeferin ka përjashtuar kategorikisht çdo mundësi që ndeshjet e Euro 2020 që do të zhvillohet këtë verë të luhen pa tifozë, shkruan Sinjali Sport.

Për momentin 11 qytete kanë garantuar që mund të plotësojnë kushtet sanitare për të pritur tifozë verën e ardhshme në impiantet e tyre ndërkohë që në dyshim janë Dublini dhe Glasgow pasi qeveria skoceze është shfaqur skeptike dhe pritet të mos lejojë praninë e tifozëve në një nga dy qytetet që mund të zgjidhet për të pritur ndeshje të Euro 2020.

Slloveni Çeferin në një intervistë të dhënë së fundmi nënvizoi se ato qytete që nuk do të garantojnë dot praninë e tifozëve në impiante do të jenë jashtë liste dhe do të zëvendësohen nga qytete të tjera.

Ne jemi duke punuar për skenarë të ndryshëm, por e vetmja garanci që mund të japim është se opsioni për të luajtur ndonjë ndeshje të Euro 2020 në një stadium të zbrazët është përjashtuar. Çdo qytet do të duhet të sigurojë që do të ketë tifozë në tribuna gjatë ndeshjeve të tyre. Skenari ideal është të luash turneun në 12 vendet e paracaktuara, por nëse kjo nuk është e mundur do të vazhdojë në 10 ose 11 vende”, u shpreh Çeferin, shkruan Sky Sport.

Euro 2020 ishte në program për t’u luajtur verën e kaluar por u shty për këtë vit për shkak të pandemisë COVID-19.

Kompeticioni i dytë më i rëndësishëm në rang kombëtaresh pas Kupës së Botës do të startojë në 11 qershor të këtij viti dhe do të përfundojë më 12 korrik, në një edicion të veçantë që do të zhvillohet në 12 shtete të ndryshme me rastin e 60-vjetorit të kampionatit të parë europian.

Leave a Reply

Your email address will not be published. Required fields are marked *