Presidenti Joe Biden ka në plan të njoftojë të Premten se Shtetet e Bashkuara do të kontribuojnë 2 miliardë dollarë në një program të mbështetur nga OKB që kërkon shpërndarjen e dozave të vaksinave COVID-19 te njerëzit në vendet më të varfra në botë.
Lajmi bëhet me dije nga zyrtarët e lartë të administratës Biden.
Kongresi tashmë kishte alokuar paratë në dhjetor për Agjencinë Amerikane për Zhvillim Ndërkombëtar për t’i siguruar përmes Gavi-it, një aleancë ndërkombëtare e shpërndarjes së vaksinave.
Kongresi siguroi një total prej 4 miliardë dollarësh dhe zyrtarët thanë se SHBA do t’i jepnin pjesën tjetër Gavi-it gjatë këtij viti dhe 2022.
Masa, të cilën Shtëpia e Bardhë tha se Biden synon të shpallë gjatë një takimi virtual të liderëve të Grupit të G-7, vjen ndërsa Shtetet e Bashkuara ndeshen mungesë dozash të mjaftueshme për të vaksinuar popullsinë e tyre, megjithëse situata në vendet e varfëra është shumë më e keqe.
Deri më sot, 10 vende kanë administruar 75% të të gjitha vaksinave COVID-19, ndërsa më shumë se 130 vende nuk kanë marrë ende një dozë të vetme, thanë të mërkurën Kombet e Bashkuara.
Shumë vende nuk janë në gjendje të konkurrojnë me vendet më të pasura si Sh.B.A. për të blerë sasitë e kufizuara të dozave të vaksinave në dispozicion nga prodhuesit.
Në bashkëpunim me Organizatën Botërore të Shëndetësisë dhe fondacionin Koalicioni për Inovacione të Gatishmërisë Epidemike, Gavi po drejton një iniciativë vaksinimi në mbarë botën të quajtur COVAX që synon të adresojë këtë pabarazi.